A Asociación Compostelá de Esclerose Múltiple, Párkinson, ELA, outras enfermidades neurodexenerativas e enfermidades raras (ACEM) é unha organización sen ánimo de lucro creada en 1995 co obxectivo de contribuír a mellorar a calidade de vida das persoas afectadas por estas enfermidades, así como a dos seus familiares e persoas coidadoras. En 2007 foi recoñecida como entidade de Utilidade Pública.

ACEM ten 30 anos de experiencia co colectivo de persoas con discapacidade e dependencia. No seu Centro de Rehabilitación Integral de Santiago, ACEM ofrece atención multidisciplinaria e integral, paliativa e preventiva a través dun Programa de Rehabilitación integral que é posible grazas a unha ducia de profesionais sociosanitarios que prestan os servizos de fisioterapia, logopedia, terapia ocupacional, atención psicolóxica, preparación física, dietética e nutrición, ademais de educación e integración social, asesoramento xurídico e traballo social.

A entidade tamén leva a cabo actividades complementarias como pilates, golf adaptado e artes plásticas, diversos obradoiros e seminarios, actividades de dinamización e integración social e accións de divulgación e de sensibilización.

Máis información en www.acemsantiago.org